مقالتنا انهاردة بعنوان
الشخصية الحدية Borderline personality disorder
المقالة عبارة عن حوار مع د.محمد سعد العش المدير الطبي لعيادة توازن للصحة النفسية
د.ماجستير الطب النفسي وطب المخ والاعصاب بجامعة عين شمس.
خبرة ٦ سنوات ف علاج الامراض النفسية وعلاج الإدمان.
خبرة ف علاج:
اضطرابات المزاج والاكتئاب والقلق
نوبات الهلع والذعر
الاضطراب الوجداني ثنائي القطب
اضطراب الفصام الذهاني
اضطرابات الشخصية
الاضطرابات النفسية والسلوكية المرتبطة بالإدمان وسوء استخدام العقاقير
عمل دكتور محمد سعد طبيب نفسي في مستشفى هدوء للطب النفسي وعلاج الإدمان.
عمل طبيب نفسي مقيم بمركز عكاشة للطب النفسي في مستشفى الدمرداش.
حصل على شهادة CME ف الطب النفسي من جامعة عين شمس.
حصل علي دبلومة الطب القائم علي الأدلة في علاج اضطرابات المزاج.
د.محمد سعد يشرف علي العلاج الدوائي لمرضي الإدمان بالعديد من المراكز المتخصصة
قام بعلاج مئات المرضي من الإدمان بأنواعه
مقالتنا النهارده عن الشخصيه الحدية الشهيرة بالبوردرلاين
Borderline personality
وهنبدأ بسؤال دكتور محمد سعد
س. ايه هي الشخصيه الحديه يا دكتور حضرتك اتكلمت عنها في المقاله اللي فاتت و كنا متشوقين نعرف عنها اكثر
ج. والله بصي بالنسبه للشخصيه الحديه فهي كمصطلح بتكون موصومه في المجتمع للاسف
ليه الوصمه دي؟
لان الشخصيات دي بتبقى حساسه جدا شخصيات مولوده عندها حساسيه في الجهاز العصبي بتبقي حساسة بزيادة اكثر من الناس الطبيعية وبالتالي الحساسية دي بتخلي عندها صعوبه في تنظيم المشاعر
زي ايه؟
انها بتطلع انفعالاتها ومشاعرها على شكل انفجارات هي مش بتعبر عنها كويس فمش بتعرف تقول انا حزينه انا سعيده انا غضبانه
ما بتعرفش تتعامل مع مشاعرها ما بتعرفش تطبطب علي نفسها
مابتعرفش حتي احيانا تسمي مشاعرها وتعرف هي حاسة بإيه دلوقتي
اضطراب الشخصية الحدية بيظهر في الستات اكثر من الرجاله لكن دا مينفيش وجوده في الرجالة طبعا لكن بنسبة اقل.
س.طيب ايه نوعية المشاكل اللي بتقع فيها الشخصيات الحدية وبتخليها تتوصم من المجتمع؟
طبعا الشخصيات الحديه بتعمل حاجات اندفاعيه
زي ايه ؟
الاندفاعيه دي ان الواحد ما يعرفش عواقب الامور
ما يفكرش قبل ما يتصرف
هم ما بيفكروش قبل ما يتصرفوا بيندفعوا على طول وده اللي بيخليهم ياخدوا قرارات خاطئة ويخسروا علاقات مهمة في حياتهم
الشخصيات الحديه ما بتقدرش عواقب الامور بمعنى انها ممكن تتصرف من غير ما تفكر
ومع الوقت بيحسوا باليأس بسهولة وممكن يحاولوا يأذوا نفسهم او حتي ينتحروا ودا معنى الاندفاعيه .
معنى عدم تنظيم المشاعر
هو انها بتلاقي صعوبه في تسمية مشاعرها وفي التعبير عنها بشكل صحي وبالتالي ده بيعمل مشاكل لان كلنا كبشر بنحتاج اننا نعبر عن مشاعرنا ونتعامل معاها بشكل صحي
الشخصيات الحديه بتبقى حاسه بفراغ من جواها
بيبقى حاسه دايما إن ناقصها حاجه
الشخصيه الحديه على فكره احيانا كثير بتبقى شخصيات جدعه بس مشكلتها انها بتدي بزياده بزياده قوي ومن غير ما تطلب وبعدين بتتوقع ان الشخص الثاني هيديها نفس الكلام وهيضحي عشانها زي ما هي بتعمل
والصدمة انها مبتلاقيش دا
بيكون عندهم مشاكل في الحدود الشخصية
الحدود دي ممكن تكون حدود في الملكيه او حدود جسدية او حدود عاطفيه او حدود شخصيه ايا كانت
عدم وجود الحدود هو اللي بيسمح للشخص الثاني انه يجي عليها لأنها ما تقولش لأ
ما بترفضش الطلب وبعدين لما تبقى متوقعه ان الشخص اللي قدامها يعمل وميحصلش بتتصدم وتتوجع فتبدأ تغضب ولما تغضب تبدأ بقي تكسر حاجات وهكذا
وطبعا مننساش انهم بيفكروا بالابيض والأسود
إما يقدس اللي قدامه ويرفعه لمكان عالية او يحقره ويقلل منه جدا
وعندهم مشكلة في التعلق بالاشخاص وبيفهموا دا انه حب
الشخصيات الحديه نتيجه اللي فات ده كله بتبقى علاقاتها مش احسن حاجه
يعني ايه
يعني بتبقى كل شويه في مشاكل في العلاقات تقطع مع دي وتقطع مع ده وتزعل من ده وتتخانق مع دي
الكلام ده كله بينتج عنه شعورها بالوحده وبالتالي بتبدأ بأنها لمابتعرفش تعبر عن مشاعرها تبدأ تاذي نفسها
تبدأ تشرط ايديها اللي هو بنسميه cutting
تبدا تحاول تنتحر احيانا تبلع حبوب
تبدا تطفي مشاعرها بالمخدرات
وبذلك بينتج عندنا اضطراب ثاني خالص اسوا الا وهو تعاطي المخدرات ودا اضطراب سيء جدا طبعا ومشاكله اكبر
تبدا تدخل في علاقات جنسيه علشان تعوض احساسها بالفراغ واحساسها انها مرفوضه واحساسها ان ماحدش بيحبها
طبعا الكلام ده كله بيبقى ناشئ من التربيه
يعني ايه ؟
يعني الشخصيه الحديه ليها ظروف بتؤدي لنشأتها
الظروف دي بيبقى منها مثلا ان الاب او الام بيبقى ما بينهم خناقات كثير قدام الاولاد
واحيانا ممكن تتعرض لاساءات جنسيه وهي صغيره زي حوادث التحرش.
عشان كده من الحاجات المهمه جدا ان احنا نحافظ على اطفالنا وان احنا ما نسيبش البنات بالذات مع ناس غريبة او منعرفهمش أيا كانوا حتي لو الجيران
الشخصيه الحديه كمان بتبقى في مسار معين للعلاقات في حياتها
يعني اغلب العلاقات مابتكملش
وبالتالي فالشخصيات الحديه احيانا لما بيتجوزوا ممكن جوازهم ميدومش كام سنة وبعدها يبقي فيه حوادث طلاق وممكن تتطلق بعد كام شهر او كام اسبوع حتي
ودي اهمية العلاج قبل الحواز
كمان بيدخلوا احيانا في علاقات عاطفيه او علاقات جنسيه متعدده مع اطراف كثير لانها زي ما احنا اتكلمنا مش بتحافظ على حدودها كويس وما بتقولش لا لاي حد
والشخصيات الحديه احيانا من كثر احتياجها للمشاعر لما بتكبر وتبقي أمهات بتبلع عيالها
بتبلع عيالها يعني ايه؟ يعني بتمتص مشاعرهم تماما وبتأذيهم
بسبب كل هذه الاعراض احيانا كمان بتدخل في حاجه اسمها zone out يعني ايه
يعني تخرج بره الواقع خالص او تشوف نفسها من بره او تحس ان انا مش انا
طبعا مع كل ده فالشخصيات الحديه محتاجه نوع خاص جدا جدا جدا من العلاج العلاج ده اسمه العلاج الجدلي السلوكي
الشخصيات الحديه بيساء فهمها ويساء تشخيصها احيانا كثير
وتشخيصها ممكن يتداخل احيانا مع الاضطراب الوجداني ثنائي القطب ليه لانهم طبعا في نوبات العصبيه والتهيج والتكسير وكده ممكن حد يقول لك ده ان دي نوبة هوس
و طبعا عندهم تقلبات مزاجيه شويه مبسوطه وشويه زعلانه بس الفرق انها بتبقى مبسوطه وزعلانه في نفس اليوم ممكن في نفس الساعه انما ده ما بيبقاش في نوبه الهوس
الشخصيات الحديه احيانا ممكن تتشخص فصام لانها بتدخل في نوبات فصامية بنسميها غضب فصامي من كتر ما الغضب غير طبيعي وبيبقى مبالغ فيه جدا جدا جدا
الشخصيات الحديه ممكن للاسف تتحجز في المستشفيات احيانا
ليه تتحجز في المستشفيات؟
علشان ممكن تبقى خطر على نفسها او خطر على الاخرين
لانها ممكن تاذي نفسها ممكن تيجي تهدد انها تنتحر فتقع مثلا من البلكونة او تعور نفسها لجذب الاهتمام ومحدش يلحقها وتنزف
ممكن مثلا تقول لك انا عايزه اجذب الانتباه واعور نفسي تقوم معوره نفسها تنزل دم وما حدش يلحقها للاسف
بيبقى جواهم اكتئاب شديد جدا جدا ولذلك بتحتاج جرعات احيانا من المضادات الاكتئاب واحيانا ادويه من مضادات الفصام ومثبتات للمزاج
وجلسات علاجيه كثير بشكل اسبوعي على الاقل
علاج لمده سنه لان هم ممكن تعتبريهم وكأن الجزء المنطقي الخاص في الدماغ بالتحكم في المشاعر الجزء ده كانه منضجش بشكل تام عندهم
لا بيتأخر شويه
ممكن يمتد لسن الثلاثينات وممكن الاربعينات كمان
وبالتالي فتصرفاتهم كلها عاطفيه وبتنشق من مشاعرهم العاليه والعاليه جدا
الشخصيات دي بالاضافه لكل ده بيبقى عندهم حاجه صعبه جدا وهي انهم محتاجين اهتمام شديد وكمان ما بيكملوش في العلاج احيانا كثير
عشان كده بيحتاجوا في علاجهم نموذج معقد شويه اسمه العلاج الجدل السلوكي Dbt
ده علاج قائم على تعليم اربع مهارات
ايه المهارات دي
اولا مهاره تنظيم المشاعر
تنظيم المشاعر بيبدا بتسميتها وازاي اعبر عنها بشكل صحي وهكذا
ثانيا: تنظيم العلاقات الشخصيه
العلاقات الشخصيه وازاي احافظ على حدودي الشخصيه
ثالثا: التعامل مع الضغوط
رابعا: اليقظه الذهنيه
ازاي ابقى هنا ودلوقتي
كل ده مع التعامل مع الاضطرابات المصاحبه زي ال Adhd احيانا
و بيبقى عندهم اكتئاب شديد احيانا
و بيبقى عندهم كثير مشاكل في العلاقات احيانا
و بيبقى عندهم حاجات يعني بتحتاج نماذج تانيه من العلاج وهكذا
طيب هل البودر لاين او الشخصيه الحديه ممكن يكون عندها اضطربات ثانيه؟ اه طبعا لانها لو اخذوا مخدرات ممكن تدخل في نوبة فصام حقيقيه او نوبات هوس حقيقيه والموضوع بيكبر اكتر
واحيانا بيبقى عندهم زي وسواس قهري واحيانا بيبقى في صدمات Ptsd نتيجه مثلا تعرض لتحرش او اغتصاب او غيره
كلمة اخيرة
بنصح كل واحد اتشخص بالاضطراب دا انه يلجأ لمتخصص ويتعالج قبل ما يبدأ في اي حاجة كبيرة ف مسار حياته
وأخيرا تقدروا تنورونا في عيادتنا وأي حد عنده ظروف مادية فمش هتمنع ابدا من علاجه واحنا هنحاول علي قد مانقدر كفريق عيادة اطباء واخصائيين نساعده
وبنقدم جلساتنا في العيادة اونلاين كمان عشان لو الشخص بعيد عننا
ودا عنوان عيادة توازن للصحة النفسية
القاهرة،مصر الجديدة
عمارة ٦ شارع عبد الله نور (ناصية بنك QNB)المتفرع من الميرغني (خلف زلط ولطفي) الدور الارضي المدخل الخاص شقة رقم ١ مكرر ، بجوار نادي هليوبوليس
عند تقاطع الخليفة المأمون مع شارع الميرغني
اقرب محطة مترو هي مترو كلية البنات
وللتواصل مع العيادة
01050888774
01050888776
حسابات العياده علي مواقع التواصل
فيس بوك
https://www.facebook.com/BalanceMentalHealthClinic
يوتيوب
https://www.youtube.com/@Balance.mental
انستجرام
https://www.instagram.com/balance_mental.health
تيك توك
tiktok.com/@Balance.mental
#د_محمد_سعد